လူကုန်ကူးခံရသူများအား ပြန်လည်လက်ခံရေး၊ ပြန်လည်ဝင်ဆံ့ပေါင်းစည်းရေးနှင့် ပြန်လည်ထူထောင်ရေးဆိုင်ရာ လုပ်ငန်းကော်မတီ၏ လုပ်ငန်းညှိနှိုင်းအစည်းအဝေး (၁/၂၀၂၃)ကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနရှိ ပြန်လည်ထူထောင်ရေးဦးစီးဌာန၊ အစည်းအဝေးခန်းမတွင် ယနေ့နေ့လည် (၁၄:၀၀)နာရီ တွင် လူကုန်ကူးခံရသူများအား ပြန်လည်လက်ခံရေး၊ ပြန်လည်ဝင်ဆံ့ပေါင်းစည်းရေးနှင့် ပြန်လည်ထူထောင်ရေးဆိုင်ရာ လုပ်ငန်းကော်မတီ၊ ဥက္ကဌ၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ဒုတိယဝန်ကြီး ဦးစိုးကြည် ဦးဆောင်၍ ကျင်းပ ဆောင်ရွက်ခဲ့ပါသည်။

 ဒုတိယဝန်ကြီးက အဖွင့်အမှာစကားပြောကြားရာတွင် လုပ်ငန်းကော်မတီ အနေဖြင့်    လူကုန်ကူးခံရသူများအား  ကာကွယ်စောင့်ရှောက်ရေး လုပ်ငန်းများဆောင်ရွက် ရာတွင် လူကုန်ကူးခံရသူအဖြစ် စိစစ်ဖော်ထုတ်ချိန်ကစတင်၍ ပြန်လည်ထူထောင်ပေးသည့် အချိန်အထိ လုပ်ငန်းစဉ်တလျှောက်လုံးတွင် လုပ်ငန်းကော်မတီဝင် ဝန်ကြီးဌာနများ၊ အဖွဲ့ အစည်းများ၏ ပူးပေါင်းဆောင်ရွက်မှုများ ပိုမိုအားကောင်းရန်လိုအပ်ကြောင်း၊ လူကုန်ကူး ခံရသူများကို အချိန်နှင့်တပြေးညီ အရည်အသွေးပြည့်ဝသော ဝန်ဆောင်မှုများပေးနိုင်ရန် "လူကုန်ကူးခံရသူများအား ပြန်လည်လက်ခံရေး၊ ပြန်လည်ဝင်ဆံ့ပေါင်းစည်းရေးနှင့် ပြန်လည်ထူထောင်ရေးဆိုင်ရာ အမျိုးသားအဆင့် စံလုပ်ငန်းအစီစဉ်" ကို ဗဟိုအဖွဲ့၏  ခွင့်ပြုချက်ဖြင့် ၂၀၂၀ ပြည့်နှစ်တွင် ထုတ်ဝေဖြန့်ချိပြီးဖြစ်သည့်အတွက် ၎င်းစံလုပ်ငန်းအစီအစဉ် ပါ လုပ်ငန်းစဉ်များအတိုင်း ဆောင်ရွက်ကြရန် လိုအပ်ကြောင်းပြောကြားခဲ့ပါသည်။

  ဆက်လက်၍ ဒုတိယဝန်ကြီးက မြန်မာနိုင်ငံ၏ လူကုန်ကူးမှုတိုက်ဖျက်ရေးဆိုင်ရာ စတုတ္ထ(၅)နှစ် စီမံကိန်း(၂၀၂၂  -၂၀၂၆) ၏ (၂၀၂၃)ခုနှစ်၊ လုပ်ငန်းစီမံချက်ကို အကောင်အထည်ဖော် ဆောင်ရွက်ခဲ့ရာ မိမိတို့လုပ်ငန်းကော်မတီက အဓိကအကောင်အထည်ဖော်ဆောင်ရွက်ရမည့် လုပ်ငန်းရပ် (၃၆)ခုတွင် (၂၃)ခုကို အကောင်အထည်ဖော်ဆောင်ရွက်နိုင်ခဲ့သည့်အတွက် ရာခိုင်နှုန်းအားဖြင့် ၆၄% ပြီးစီးအောင် ဆောင်ရွက်နိုင်ခဲ့ပြီး မှတ်တမ်းမှတ်ရာများ ပြုစုထား ရန်ဖြစ်ကြောင်း၊ ၂၀၂၄ ခုနှစ် လုပ်ငန်းစီမံချက်ရေးဆွဲရာတွင် ပြောင်းလဲဖြစ်ပေါ်နေသော လူကုန်ကူးမှုလမ်းကြောင်းများ၊ လူကုန်ကူးမှုပုံစံအသစ်များနဲ့ အသုံးပြုသည့် နည်းလမ်းများ ကို အထူးဂရုပြုပြီးတားဆီးကာကွယ်ရေး၊ လူကုန်ကူးခံရသူအဖြစ် စိစစ်ဖော်ထုတ် သတ်မှတ်နိုင်ရေး၊ လူကုန်ကူးခံရသူများကို ကာကွယ်စောင့်ရှောက်ရေးစသည့်  လုပ်ငန်းနယ်ပယ် များတွင် လုပ်ငန်းရပ်များကို ထည့်သွင်းစဉ်းစားရေးဆွဲကြရမှာဖြစ်ကြောင်းနှင့်  လုပ်ငန်း ကော်မတီအနေဖြင့် ၂၀၂၃ ခုနှစ်အတွင်း အကောင်အထည်ဖော်ဆောင်ရွက်ခဲ့သည့် လုပ်ငန်းများ၏ အားသာချက်၊ အားနည်းချက်များကို ဖော်ထုတ်၍ ရှေ့လုပ်ငန်းစဉ်များ အတွက် အကြံပြုဆွေးနွေးပေးကြစေလိုကြောင်း ပြောကြားခဲ့ပါသည်။ 

 ဆက်လက်၍ အစည်းအဝေး တက်ရောက်လာသူများမှ မိမိတို့အကောင်အထည် ဖော်ဆောင်ရွက်လျက်ရှိသော လုပ်ငန်းများအား ဆွေးနွေးခဲ့ကြပြီး၊ အစည်းအဝေး ဆုံးဖြတ်ချက် (၁၀)ချက် ချမှတ်ခဲ့ပါသည်။ 

 အစည်းအဝေးသို့ လူကုန်ကူးခံရသူများအား ပြန်လည်လက်ခံရေး၊ ပြန်လည် ဝင်ဆံ့ပေါင်းစည်းရေးနှင့် ပြန်လည်ထူထောင်ရေးဆိုင်ရာလုပ်ငန်းကော်မတီ အဖွဲ့ဝင်များ ဖြစ်သည့် သက်ဆိုင်ရာဌာနများ၊ မြန်မာနိုင်ငံအမျိုးသမီးရေးရာအဖွဲ့ချုပ်နှင့် မြန်မာနိုင်ငံ မိခင်နှင့်ကလေးစောင့်ရှောက်ရေးအသင်းတို့မှ ကိုယ်စားလှယ်(၂၁)ဦး တက်ရောက်ခဲ့ပါသည်။