ရန်ကုန်မြို့၊ လူမှုဝန်ထမ်းအတတ်သင်သိပ္ပံကျောင်းတွင် (၁၂.၅.၂၀၂၃) ရက်နေ့၊ နံနက် (၉:၀၀) နာရီတွင် ကျင်းပပြုလုပ်ခဲ့သည့် လူမှုသဟဇာတနှင့်လူမှုပေါင်းစည်းရေး (နည်းပြ) သင်တန်း၊ သင်တန်းဆင်းပွဲအခမ်းအနားသို့ လူမှုဝန်ထမ်းဦးစီးဌာန၊ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်၊ ရန်ကုန်တိုင်းဒေသကြီးဦးစီးမှူးနှင့်တာဝန်ရှိပုဂ္ဂိုလ်များ၊နည်းပြများ၊ သင်တန်းသား၊ သင်တန်းသူများ တက်ရောက်ခဲ့ပါသည်။

ညွှန်ကြားရေးမှူးချုပ်၊ ဒေါက်တာစန်းစန်းအေးက Online မှတစ်ဆင့် သင်တန်းဆင်း အမှာစကားပြောကြားရာတွင် မိမိတို့ဦးစီးဌာနသည် လူမှုရေးအရထိခိုက်ခံစားနေရသော ကလေး သူငယ်များ၊ အမျိုးသမီးများ၊ မသန်စွမ်းသူများနဲ့ သက်ကြီးရွယ်အိုများအပေါ် လိုအပ်တဲ့ ကာကွယ်စောင့်ရှောက်ပေးမှုများ၊ လူမှုရေးဝန်ဆောင်မှုများနဲ့ လူမှုကာကွယ်စောင့်ရှောက်ရေး လုပ်ငန်းစဉ် များကို ဆောင်ရွက်ပေးလျက်ရှိကြောင်း၊ ပြည်သူလူထုနဲ့ထိတွေ့ဆက်ဆံနေကြတဲ့ မိမိတို့ ဝန်ထမ်းများအနေနဲ့ မတူကွဲပြားမှုတွေအပေါ်မှာ လိုက်လျောညီထွေ ဆောင်ရွက်နိုင်ဖို့ လိုအပ်ပါကြောင်း၊ မတူကွဲပြားမှုဆိုတဲ့နေရာမှာ လူတစ်ဦးနဲ့တစ်ဦး ကျား၊ မ၊ လူမျိုး၊ ဘာသာ၊ အသက်အရွယ်၊ မိသားစုအသိုင်းအဝိုင်း၊ သင်ကြားခဲ့ရတဲ့ဘာသာရပ်များ မတူညီကြသလို စိတ်ခံစားမှုနဲ့  ခံယူချက်အမျိုးမျိုးလည်း ရှိကြပါကြောင်း၊ ဝန်ထမ်းများအနေနဲ့ မတူကွဲပြားတဲ့ လူမှုပတ်ဝန်းကျင်က ပြည်သူအများနဲ့ပြောဆိုဆက်ဆံရာမှာ လူမှုသဟဇာတသဘောတရားများ ကို ကောင်းစွာသိရှိနားလည်ထားဖို့ အင်မတန်အရေးကြီးပါကြောင်း၊ တိုင်းရင်းသားလူမျိုးပေါင်း (၁၃၅) မျိုး အတူယှဉ်တွဲနေထိုင်ကြတဲ့ မိမိတို့နိုင်ငံအနေနဲ့ ဒီလိုလူမှုသဟဇာတဖြစ်စေဖို့ လူမှု ပေါင်းစည်းရေးလုပ်ငန်းများဆောင်ရွက်ကြတဲ့နေရာမှာ Positive Thinking ဖြစ်တဲ့ အကောင်း မြင်စိတ်က အရေးကြီးသလို၊ အမုန်းစကားများပြောဆိုခြင်းကိုရှောင်ကြဉ်ဖို့၊ တစ်ဦးတစ်ယောက် ရဲ့အခက်အခဲကို ကျန်သူများအနေနဲ့ စာနာနားလည်တတ်ဖို့ဟာလည်း အရေးကြီးပါကြောင်း၊ ဒါ့အပြင်မှန်ကန်တဲ့၊ ရှင်းလင်းပြတ်သားတဲ့ သတင်းအချက်အလက်များရရှိမှုဟာလည်း လူမှု သဟဇာတဖြစ်စေဖို့ အရေးပါတဲ့အကြောင်း အရင်းတစ်ရပ်ဖြစ်တယ်ဆိုတာ အားလုံးနားလည် ထားကြဖို့လိုအပ်ပါကြောင်း၊ ကလေးသူငယ်များကို မူကြိုအရွယ်မှစတင်၍ လူမှုသဟဇာတ ဆိုင်ရာအတွေးအမြင်၊ အယူအဆများ ထည့်သွင်းပေးလိုက်ခြင်းအားဖြင့် ငြိမ်းချမ်းတဲ့ လူမှု ပတ်ဝန်းကျင်တစ်ရပ်ပေါ်ထွန်းဖို့ အထောက်အပံ့ပေးနိုင်တဲ့အတွက် မူလတန်းကြိုကျောင်းများ တွင် လူမှုသဟဇာတဆိုင်ရာ သီချင်းများ၊ ကဗျာများ၊ ပုံပြင်များကို ထည့်သွင်းသင်ကြားဖို့ အထူးမှာကြားလိုပါကြောင်း၊  ပြီးခဲ့တဲ့ ၂၀၂၂-၂၀၂၃ ခု၊ ဘဏ္ဍာ နှစ်မှာ မိမိတို့ဦးစီးဌာနအနေနဲ့ တိုင်းဒေသကြီး/ပြည်နယ်များမှာ လူမှုသဟဇာတနှင့် လူမှုပေါင်း စည်းရေးသင်တန်း (၂၄) ကြိမ် ဖွင့်လှစ်နိုင်ခဲ့ပြီး (၇၂၇) ဦးကို အသိပညာဖြန့်ဝေနိုင်ခဲ့၍ စီမံကိန်းအရ ရာနှုန်းပြည့် ဆောင်ရွက်နိုင်သော်လည်း တစ်နိုင်ငံလုံးအတွက်မူလွှမ်းခြုံနိုင်မှု အားနည်းနေသေးကြောင်း၊ ဒီအတွက် ယခုနည်းပြသင်တန်းကိုဖွင့်လှစ်ပြီး နည်းပြများများ မွေးထုတ်ရန်စီစဉ်ခဲ့ခြင်း ဖြစ်ပါကြောင်း၊ သင်တန်းဆင်းဝန်ထမ်းများအနေနဲ့ မိမိတို့ရပ်ရွာဒေသမှာ ဖွင့်လှစ်မယ့် ဆင်ပွား သင်တန်းများမှတစ်ဆင့် ရပ်ရွာပြည်သူလူထုအတွင်း တတ်စွမ်းသမျှ ထပ်ဆင့်အသိပညာပေးကာ ပညာရပ်များကို အကျိုးရှိရှိပြန်လည်အသုံးချဖို့နဲ့ ဒေသဖွံ့ဖြိုးတိုးတက်ရေးလုပ်ငန်းစဉ်များကို ပိုမိုမြှင့်တင်ဖော်ဆောင်ကြဖို့လိုအပ်ပါကြောင်း တိုက်တွန်း ပြောကြားခဲ့ပါသည်။

            ထို့နောက် သင်တန်းသားများကိုယ်စား သင်တန်းသူတစ်ဦးမှ ကျေးဇူးတင်စကား ပြန်လည်ပြောကြားခဲ့ပြီး ရန်ကုန်တိုင်းဒေသကြီးဦးစီးမှူးမှ သင်တန်းသားတစ်ဦးချင်းအလိုက် သင်တန်းဆင်းလက်မှတ်များ ပေးအပ်ခဲ့ပါသည်။