လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ဒုတိယဝန်ကြီးဦးစိုးကြည်သည်အပြည်ပြည်ဆိုင်ရာကြက်ခြေနီကော်မတီ (ICRC) ရုံး၏မြန်မာနိုင်ငံဆိုင်ရာဌာနေကိုယ်စားလှယ်ဖြစ်သူ Ms. Elena AjmoneSesseraဦးဆောင်သောကိုယ်စားလှယ်အဖွဲ့အားယနေ့မွန်းလွဲပိုင်းတွင်အဆိုပါဝန်ကြီးဌာန၊ဧည့်ခန်းမ၌လက်ခံတွေ့ဆုံခဲ့ပါသည်။
ထိုသို့တွေ့ဆုံရာတွင်ICRC ရုံး၏မြန်မာနိုင်ငံဆိုင်ရာဌာနေကိုယ်စားလှယ်ဖြစ်သူMs. Elena AjmoneSessera ကမြန်မာနိုင်ငံဆိုင်ရာဌာနေကိုယ်စားလှယ်အသစ်အဖြစ်တာဝန်ထမ်းဆောင်မည့် Mr. Arnaud de Baecqueနှင့်မိတ်ဆက်ပေးပြီးဝန်ကြီးဌာနမှ ဆောင်ရွက်နေသည့် လူသားချင်းစာနာမှုအကူအညီပေးရေး၊ ဘေးအန္တရာယ်စီမံခန့်ခွဲရေး၊မိုင်းအန္တရာယ်အသိပညာပေးရေး၊ မိုင်းအန္တရာယ်ကြောင့်ထိခိုက်ခံရသူများအားပြန်လည်ထူထောင်ရေးလုပ်ငန်းများ၊ ICRC မှ ဆောင်ရွက်နေသည့် မိုင်းအန္တရာယ်ကြောင့် ကိုယ်အင်္ဂါမသန်စွမ်းသူများအားခြေတု၊ လက်တုတပ်ဆင်ရေးလုပ်ငန်းများ၊ ဝန်ကြီးဌာနနှင့် ICRC တို့ကြားပူးပေါင်းဆောင်ရွက်ရေးကိစ္စများအားရင်းနှီးပွင့်လင်းစွာဆွေးနွေးခဲ့ကြပါသည်။ တွေ့ဆုံပွဲသို့ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန၊ညွှန်ကြားရေးမှူးချုပ်၊ဘာသာရပ်ဆိုင်ရာအရာထမ်းများနှင့်ICRCရုံးမှကိုယ်စားလှယ်များပါဝင်တက်ရောက်ခဲ့ကြကြောင်းသတင်းရရှိပါသည်။
