လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီးဒေါက်တာစိုးဝင်းအား မြန်မာနိုင်ငံဆိုင်ရာကုလသမဂ္ဂလူသားချင်းစာနာထောက်ထားမှုဆိုင်ရာညှိနှိုင်းရေးရုံး (UNOCHA) ၏အကြီးအကဲဖြစ်သူ Mr. Sajjad Mohammad Sajidဦးဆောင်သောအဖွဲ့သည်ယနေ့မွန်းလွဲပိုင်း (၁၄:၀၀) နာရီတွင်အဆိုပါဝန်ကြီးဌာန၊အစည်းအဝေးခန်းမ၌လာရောက်တွေ့ဆုံခဲ့ပါသည်။

တွေ့ဆုံစဉ်ကုလသမဂ္ဂလူသားချင်းစာနာထောက်ထားမှုဆိုင်ရာနှင့်အရေးပေါ်ကယ်ဆယ်ရေးဆိုင်ရာညှိနှိုင်းရေးမှူး Under Secretary General Mr. Martin Griffiths ၏မြန်မာနိုင်ငံခရီးစဉ်အတွက်ညှိနှိုင်းဆောင်ရွက်ပေးခဲ့မှုများ၊လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနနှင့်UNOCHAတို့အကြားသဘောတူညီမှုစာလွှာ (LoA) သက်တမ်းတိုးရေးကိစ္စ၊ပြည်ဝင်ဗီဇာဆိုင်ရာကိစ္စများ၊ပြည်တွင်းခရီးသွားလာခွင့်ကိစ္စများ၊ နိုင်ငံတကာအဖွဲ့အစည်းများ၏အသင်းအဖွဲ့မှတ်ပုံတင်ရေးဆိုင်ရာကိစ္စများ၊ဝန်ကြီးဌာနနှင့် UNOCHA တို့အကြားပူးပေါင်းဆောင်ရွက်သွားမည့်ကိစ္စများနှင့် လူသားချင်းစာနာထောက်ထားမှုဆိုင်ရာ ကိန်းဂဏန်းအချက်အလက်ဖော်ပြမှုများတွင် နိုင်ငံတော်က ထုတ်ပြန်ထားသည့် ကိန်းဂဏန်းများ၊ မြေပြင်အခြေအနေမှန်များကို ထင်ဟပ် ဖော်ပြနိုင်ရေး ပူးပေါင်းဆောင်ရွက်ရန်တို့ကိုရင်းနှီးပွင့်လင်းစွာအမြင်ချင်းဖလှယ်ဆွေးနွေးခဲ့ပါသည်။ တွေ့ဆုံပွဲသို့ဒုတိယဝန်ကြီးဦးစိုးကြည်၊အမြဲတမ်းအတွင်းဝန်၊ဦးစီးဌာနများမှညွှန်ကြားရေးမှူးချုပ်များနှင့်တာဝန်ရှိသူများပါဝင်တက်ရောက်ခဲ့ကြကြောင်းသတင်းရရှိပါသည်။