လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ပြည်ထောင်စုဝန်ကြီးဒေါက်တာစိုးဝင်းအားအပြည်ပြည်ဆိုင်ရာကြက်ခြေနီကော်မတီ (ICRC) ၏မြန်မာနိုင်ငံဆိုင်ရာဌာနေကိုယ်စားလှယ် Ms. Elena AjmoneSesseraဦးဆောင်သောအဖွဲ့သည်ယနေ့မွန်းလွဲပိုင်း (၁၃:၀၀) နာရီတွင်အဆိုပါဝန်ကြီးဌာန၊ဧည့်ခန်းမ၌လာရောက်တွေ့ဆုံခဲ့ပါသည်။

တွေ့ဆုံစဉ်ရခိုင်ပြည်နယ်အတွင်းလူမှုပဋိပက္ခကြောင့် လူသားချင်းစာနာမှုအကူအညီလိုအပ်သူများအတွက် ၂၀၁၇ ခုနှစ်မှစ၍ အပြည်ပြည်ဆိုင်ရာကြက်ခြေနီကော်မတီ(ICRC)၊ အပြည်ပြည်ဆိုင်ရာကြက်ခြေနီနှင့်လခြမ်းနီအသင်းများဖက်ဒရေးရှင်း(IFRC)နှင့် မြန်မာနိုင်ငံကြက်ခြေနီအသင်း(MRCS)တို့မှတစ်ဆင့်လူသားချင်းစာနာမှုအကူအညီပေးအပ်ခဲ့မှု၊ရခိုင်ပြည်နယ်အတွင်း COVID -19 တုံ့ပြန်ရေးလုပ်ငန်းများတွင် ICRC မှ ကူညီဆောင်ရွက်ပေးခဲ့မှု၊၂၀၂၁ ခုနှစ်၊ ဖေဖော်ဝါရီလမှ ယနေ့အထိပြည်တွင်းနေရပ်စွန့်ခွာသူများအားဝန်ကြီးဌာန၏ ဘတ်ဂျက်(၁၁၄) ဘီယီယံကျပ်သုံး၍ အထောက်အပံ့ပေးနေမှုအခြေအနေများ၊ ICRCနှင့် မြန်မာနိုင်ငံကြက်ခြေနီအသင်းတို့ပူးပေါင်း၍ဆောင်ရွက်လျက်ရှိသောလူသားချင်းစာနာမှုလုပ်ငန်းများ၊ ကျန်းမာရေးဝန်ကြီးဌာနနှင့် ICRC တို့အကြားရခိုင်ပြည်နယ်တွင် လုပ်ငန်းပူးပေါင်းဆောင်ရွက်နိုင်ရန် Regional Agreement လက်မှတ်ရေးထိုးနိုင်ရေးဆောင်ရွက်နေမှု၊ မိုင်းထိခိုက်ခံရသူများအတွက် ICRC၏ခြေတုလက်တုတပ်ဆင်ပေးရေးလုပ်ငန်းများ၊ဝန်ကြီးဌာနနှင့် ICRC တို့အကြားလူသားချင်းစာနာထောက်ထားမှုလုပ်ငန်းများတွင် ပူးပေါင်းဆောင်ရွက်သွားနိုင်ရေးတို့အားရင်းနှီးပွင့်လင်းစွာအမြင်ချင်းဖလှယ်ဆွေးနွေးခဲ့ကြပါသည်။ တွေ့ဆုံပွဲသို့ဒုတိယဝန်ကြီးဦးစိုးကြည်၊အမြဲတမ်းအတွင်းဝန်၊ဦးစီးဌာနများမှညွှန်ကြားရေးမှူးချုပ်များနှင့်တာဝန်ရှိသူများပါဝင်တက်ရောက်ခဲ့ကြကြောင်းသတင်းရရှိပါသည်။