လူမှုဝန်ထမ်းဦးစီးဌာနက Quick Win Project အနေဖြင့် ဆောင်ရွက်လျက်ရှိသည့်ကိုဗစ်-၁၉ကာလအတွင်းကျေးလက်နေအမျိုးသမီးများအတွက် အသက်မွေးဝမ်းကျောင်းလုပ်ငန်းများ ပြန်လည်ထူထောင်ရေးစီမံချက်အကောင်အထည်ဖော်ရေးတွင် အသက်မွေးဝမ်းကျောင်းသင်တန်းပူးပေါင်းပါဝင်ဖွင့်လှစ်သော မြန်မာနိုင်ငံအမျိုးသမီးများနှင့်ကလေးသူငယ်များဘဝမြှင့်တင်ရေးအသင်း၏ ဝါးလက်မှုသင်တန်းဖွင့်ပွဲအခမ်းအနားကို ဉတ္တရသီရိမြို့နယ်၊ ဇဝနနေ့ကလေးထိန်းကျောင်းခန်းမ၌ကျင်းပပြုလုပ်ခဲ့ရာ မြန်မာနိုင်ငံလုံးဆိုင်ရာအမျိုးသမီးကော်မတီဒုတိယဉက္ကဋ္ဌ၊ လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ဒုတိယဝန်ကြီးဦးအောင်ထွန်းခိုင်၊ နေပြည်တော်အမျိုးသမီးကော်မတီဉက္ကဋ္ဌဦးမြင့်စိုး၊ မြန်မာနိုင်ငံအမျိုးသားလူ့အခွင့်အရေးကော်မရှင် ဒုတိယဉက္ကဋ္ဌဒေါက်တာနန္နာမွှန်း၊ မြန်မာနိုင်ငံအမျိုးသမီးများနှင့်ကလေးသူငယ်များဘဝမြှင့်တင်ရေးအသင်းဉက္ကဋ္ဌဒေါ်သူဇာဝေ၊ မြန်မာနိုင်ငံအမျိုးသမီးများနှင့်ကလေးသူငယ်များဘဝမြှင့်တင်ရေးအသင်းအတွင်းရေးမှူးနှင့် အဖွဲ့ဝင်များ၊ ဌာနဆိုင်ရာများမှတာဝန်ရှိပုဂ္ဂိုလ်များ၊သင်တန်းနည်းပြများ၊ နေပြည်တော်လယ်ဝေးမြို့နယ်၊ သာယာကုန်းကျေးရွာနှင့် တပ်ကုန်းမြို့နယ်၊ သကြားဟင်းအိုးကျေးရွာတို့မှသင်တန်းသူ(၂၀)ဦးတက်ရောက်ခဲ့ကြပါသည်။

အဆိုပါသင်တန်းတွင် ဒုတိယဝန်ကြီးကကမ္ဘာ့ကပ်ရောဂါကိုဗစ်-၁၉ကြောင့် ဖြစ်ပေါ်လာသည့် လူမှုစီးပွားထိခိုက်မှုများကြောင့် အမျိုးသမီးများ၏အလုပ်အကိုင်အခွင့်အလမ်းများကိုထိခိုက်စေပါကြောင်း၊အမျိုးသမီးအများစုသည်နယ်ပယ်အသီးသီးတွင် ယဉ်ကျေးမှု၊ ဓလေ့စည်းကမ်းများအရအိမ်မှုကိစ္စများကိုမိမိတာဝန်အဖြစ်လုပ်ဆောင်၍ မိသားစုကိုပံ့ပိုးပေးရပါကြောင်း၊  ဖွံ့ဖြိုးတိုးတက်ပြီးကာလများတွင် အမျိုးသမီးများသည် အမျိုးသားများနှင့်အတူရင်ဘောင်တန်းလုပ်ဆောင်လာနိုင်ပြီဖြစ်ပါကြောင်း၊ ကိုဗစ်-၁၉ကြောင့် စီးပွားရေးထိခိုက်မှုများကိုကုစားရာတွင် အမျိုးသမီးများဖွံ့ဖြိုးတိုးတက်မှုကို အားပေးမြှင့်တင်ခြင်းသည် သူတို့၏မိသားစုကိုတိုးတက်စေခြင်းဖြစ်သကဲ့သို့ နိုင်ငံတော်တည်ဆောက်ရေးနှင့်စီးပွားရေးဖွံ့ဖြိုးတိုးတက်မှု၊ငြိမ်းချမ်းမှုနှင့် တန်းတူညီမျှမှုတို့ကိုရရှိနိုင်မှာဖြစ်ပါကြောင်း၊ ပြည်ထောင်စုဝန်ကြီး၏ လမ်းညွှန်ချက်ဖြင့်  ကိုဗစ်-၁၉ ကာလအတွင်း ကျေးလက်နေအမျိုးသမီးများအတွက် အသက်မွေးဝမ်းကျောင်းလုပ်ငန်းများ ပြန်လည် ထူထောင်ရေးဆိုင်ရာ လုပ်ငန်းစီမံချက်ကို စီမံချက်(၁၊၂၊၃)အဆင့်ဆင့် သတ်မှတ်၍ နေပြည်တော်လယ်ဝေးမြို့နယ်၊ သာယာကုန်းကျေးရွာနှင့် တပ်ကုန်းမြို့နယ်၊ သကြားဟင်းအိုးကျေးရွာတို့တွင် ဆောင်ရွက်လျက်ရှိရာစီမံချက်အဆင့်(၂)၏ အသက်မွေးဝမ်းကျောင်းဆိုင်ရာနှင့်နည်းပညာဆိုင်ရာသင်တန်းများအဖြစ် မြန်မာနိုင်ငံအမျိုးသမီးများနှင့်ကလေးသူငယ်များဘဝမြှင့်တင်ရေးအသင်းက ပူးပေါင်းပါဝင်ဆောင်ရွက်သည့် ဝါးလက်မှုသင်တန်းဖြစ်ပြီး သဘာဝအလျောက်ပေါက်ရောက်လျက်ရှိသော ဝါးများကိုစနစ်တကျအသုံးပြု၍အိမ်တွင်းလက်မှုထည်ပစ္စည်းများစနစ်တကျစီးပွားဖြစ်ထုတ်လုပ်ရောင်းချနိုင်ရန်ထိရည်ရွယ်သင်ကြားသည့် အစီအစဉ်ဖြစ်တဲ့အတွက်မိသားစုဝင်ငွေတိုးပွားစေမည့်အပြင်ဈေးကွက်စီမံခန့်ခွဲမှုကိုလည်းသိရှိနားလည်နိုင်မည်ဖြစ်၍ အကျိုးရှိတဲ့သင်တန်းတစ်ခုဖြစ်ပါကြောင်း၊သင်တန်းသူများအနေဖြင့်တတ်မြောက် သည်မှ ပိုမိုဖန်တီးတီထွင်နိုင်သည်အထိကြိုးစားသင်ယူကြရန်တိုက်တွန်းပြောကြားခဲ့ပါသည်။

ဆက်လက်၍မြန်မာနိုင်ငံအမျိုးသမီးများနှင့်ကလေးသူငယ်များဘဝမြှင့်တင်ရေးအသင်းဉက္ကဋ္ဌက အမှာစကားပြောကြားခဲ့ပြီးသင်တန်းနည်းပြကသင်တန်းဖွင့်လှစ်ရခြင်း၏ ရည်ရွယ်ချက်အားရှင်းလင်းတင်ပြခဲ့ပါသည်။

ယခုဖွင့်လှစ်မည့် ဝါးလက်မှုသင်တန်းကို(၂၃.၁၁.၂၀၂၂)ရက်နေ့မှ (၂၉.၁၁.၂၀၂၂)ရက်နေ့အထိ (၇)ရက်ကြာသင်ကြားသွားမည်ဖြစ်ကြောင်းသတင်းရရှိပါသည်။