တစ်ခုတည်းသော အာဆီယံ၊ တစ်ခုတည်းသောတုံ့ပြန်မှု (One ASEAN One Response-OAOR Roadshow) အလုပ်ရုံဆွေးနွေးပွဲကို ယနေ့နံနက်ပိုင်းတွင် နေပြည်တော်ရှိ Park Royal Hotel ၌လူမှုဝန်ထမ်း၊ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနနှင့် AHA Centre တို့ ပူးပေါင်း၍ ကျင်းပပြုလုပ်ခဲ့ပါသည်။

ဖွင့်ပွဲအခမ်းအနား၌ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၊ ပြည်ထောင်စုဝန်ကြီးကအဖွင့်အမှာစကားကို Video Message ဖြင့် ပြောကြားရာတွင် One ASEAN One Response ကြေညာစာတမ်းကိုအာဆီယံသဘာဝဘေးအန္တရာယ်စီမံခန့်ခွဲမှုကော်မတီ (ASEAN Committee on Disaster Management- ACDM)နှင့်  AHA Centre တို့က အကောင်အထည်ဖော်ဆောင်ရွက် နေပါကြောင်း၊အာဆီယံဒေသတွင်းနိုင်ငံများမှ ဘေးအန္တရာယ်ဆိုင်ရာစီမံခန့်ခွဲမှုနယ်ပယ်များတွင် ပါဝင်ဆောင်ရွက်နေကြသည့် အစိုးရနှင့် အစိုးရမဟုတ်သည့် အဖွဲ့အစည်းများအားလုံး ဘေးတုံ့ပြန်ရေးလုပ်ငန်းများကို ရင်းနှီးကျွမ်းဝင်စွာဖြင့် စနစ်တကျလုပ်ဆောင်နိုင်ရေးသည် အရေးကြီးသဖြင့် ယခု OAOR Roadshow ကို ကျင်းပခြင်းဖြစ်ပါကြောင်း၊ မြန်မာနိုင်ငံတွင် မကြာသေးမီနှစ်များအတွင်းဖြစ်ပွားခဲ့သည့် ၂၀၂၃ ခုနှစ်မိုခါမုန်တိုင်းနှင့် ၂၀၂၄ ခုနှစ်ရာဂီမုန်တိုင်း၏သက်ရောက်မှုကြောင့် ရေကြီး‌ရေလျှံမှုများဖြစ်စဉ်များတွင် နိုင်ငံတော်မှ ထိရောက်သည့် တုံ့ပြန်ရေးလုပ်ငန်းများ၊ စီမံခန့်ခွဲမှုများဆောင်ရွက်ခဲ့ပါကြောင်း၊ ထို့အပြင် အာဆီယံသည် AHA Centre မှတစ်ဆင့် ဘေးသင့်သူများအတွက်ကယ်ဆယ်ရေးပစ္စည်းများ ထောက်ပံ့ခြင်း၊သတင်းအချက်အလက်နှင့် နည်းပညာပိုင်းဆိုင်ရာကူညီပံ့ပိုးခြင်းများအတွက် နိုင်ငံတော်နှင့် ဘေးသင့်သူများကိုယ်စားကျေးဇူးတင်ပါကြောင်းနှင့်အဆိုပါ ပူးပေါင်း ဆောင်ရွက်မှုသည် အာဆီယံ၏ One ASEAN One Responseကို ထိရောက်စွာ အကောင်အထည်ဖော်ခြင်းပင်ဖြစ်ပါကြောင်း ပြောကြားခဲ့ပါသည်။

ထို့နောက် ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနက မြန်မာနိုင်ငံ၏ သဘာဝဘေး အန္တရာယ်ဆိုင်ရာစီမံခန့်ခွဲမှုတုံ့ပြန်ဆောင်ရွက်ရေးလုပ်ငန်းစဉ်အားလည်းကောင်း၊ အာဆီယံ အတွင်းရေးမှူးချုပ်ရုံးက အာဆီယံ၏ဘေးအန္တရာယ်စီမံခန့်ခွဲမှုနှင့်အရေးပေါ်တုံ့ပြန်ရေး ဆိုင်ရာမူဝါဒများ၊ လုပ်ထုံးလုပ်နည်းများအားလည်းကောင်း၊ AHA Centre က အရေးပေါ် တုံ့ပြန်ရေးလုပ်ငန်းများဆောင်ရွက်နိုင်ရေးအတွက် အာဆီယံကရေးဆွဲထားရှိသောစံသတ်မှတ် ထားသောလုပ်ထုံးလုပ်နည်းများ(SASOP)အားလည်းကောင်း၊ အာဆီယံဆက်ဆံရေးရုံးနှင့်  အင်ဒိုနီးရှားနိုင်ငံ UNOCHA က အာဆီယံအရေးပေါ်တုံ့ပြန်ရေးနှင့်ဆန်းစစ်လေ့လာရေးအဖွဲ့ (ASEAN-ERAT)နှင့်ကုလသမဂ္ဂသဘာဝဘေးအန္တရာယ် ဆန်းစစ်လေ့လာရေးနှင့် ပူးပေါင်းဆောင်ရွက်ရေးအဖွဲ့ (UNDAC) အဖွဲ့တို့၏လုပ်ငန်းဆောင်ရွက်မှုအားလည်းကောင်း အသီးသီးရှင်းလင်းဆွေးနွေးခဲ့ပြီး တက်ရောက်လာသူများက သိရှိလိုသည်များ မေးမြန်းခဲ့ ကြပါသည်။

ယင်းနောက် အလုပ်ရုံဆွေးနွေးပွဲကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာ ချထားရေးဝန်ကြီးဌာန၊ ဒုတိယဝန်ကြီး၊ ဦးစိုးကြည်ကနိဂုံးချုပ်အမှာစကားပြောကြား၍ ရုပ်သိမ်းခဲ့ပါသည်။

အလုပ်ရုံဆွေးနွေးပွဲသို့ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၊ ဒုတိယဝန်ကြီး၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ သက်ဆိုင်ရာဝန်ကြီးဌာနနှင့် ဦးစီးဌာနမှကိုယ်စားလှယ်များ၊ လူမှုရေးအသင်းအဖွဲ့မှ ကိုယ်စားလှယ်များ၊ မြန်မာနိုင်ငံဆိုင်ရာ အာဆီယံသံရုံးများမှ ကိုယ်စားလှယ်များ၊ အာဆီယံအတွင်းရေးမှူးချုပ်ရုံး၊ အာဆီယံဘေးအန္တရာယ်စီမံခန့်ခွဲမှု ဆိုင်ရာလူသားချင်းစာနာ အကူအညီပေးရေး ညှိနှိုင်းမှုဗဟိုဌာန (AHA Centre)၊ UNOCHA ၏ အာဆီယံဆက်ဆံရေးရုံးနှင့် အင်ဒိုနီးရှားနိုင်ငံရုံးအကြီးအကဲနှင့် အရပ်ဘက်လူမှုရေးအသင်းအဖွဲ့များမှ ကိုယ်စားလှယ်များ တက်ရောက်ခဲ့ကြကြောင်း သတင်းရရှိပါသည်။