၂၀၂၅-၂၀၂၆ဘဏ္ဍာနှစ်အတွက် ပြည်ထောင်စုနယ်မြေ၊ နေပြည်တော်အတွင်းရှိ အသက်၈၅နှစ်နှင့်အထက်သက်ကြီးပုဂ္ဂိုလ်များအား လူမှုရေးပင်စင်ထောက်ပံ့ခြင်း၊ စေတနာ့ဝန်ထမ်းအဖွဲ့အစည်းများအားထောက်ပံ့ကြေးများပေးအပ်ခြင်းနှင့် တိုက်ပွဲရှောင်ပြည်သူများအတွက်အမျိုးသားသဘာဝဘေးအန္တရာယ်ဆိုင်ရာစီမံခန့်ခွဲမှုရန်ပုံငွေမှထောက်ပံ့ကြေးပေးအပ်ခြင်းအခမ်းအနားကို၈-၉-၂၀၂၅ ရက်နေ့၊ နေ့လယ်ပိုင်းတွင် ပျဉ်းမနားမြို့၊ မင်္ဂလာဗျူဟာခန်းမ၌ ကျင်းပရာလူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီးဒေါက်တာစိုးဝင်း၊ ဒုတိယဝန်ကြီး ဒေါက်တာသန်းစိုး၊ နေပြည်တော်ကောင်စီဝင်များ၊ ဌာနဆိုင်ရာတာဝန်ရှိသူများနှင့်စေတနာ့ဝန်ထမ်းအဖွဲ့အစည်းများမှကိုယ်စားလှယ်များတက်ရောက်ခဲ့ကြပါသည်။
အခမ်းအနားတွင်ပြည်ထောင်စုဝန်ကြီးကလူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနအနေဖြင့်လူမှုကာကွယ်စောင့်ရှောက်ရေးလုပ်ငန်းများနှင့်လူမှုဖွံ့ဖြိုးတိုးတက်ရေးလုပ်ငန်းများကိုဆောင်ရွက်လျက်ရှိရာ သက်ကြီးပုဂ္ဂိုလ်များအတွက် အထောက်အပံ့ဖြစ်နိုင်စေရေးနှင့်၎င်းတို့အားလေးစားတန်ဖိုးထားခြင်းအားဖြင့်နိုင်ငံတော်အစိုးရမှထောက်ပံ့သည့် လူမှုကာကွယ်စောင့်ရှောက်ရေးအစီအစဉ်အဖြစ် အသက် ၈၅ နှစ်နှင့်အထက် သက်ကြီးပုဂ္ဂိုလ်များအတွက် လူမှုရေးပင်စင်ထောက်ပံ့ကြေးများကို ၆ လစာ တစ်စုတစ်စည်းတည်း ပေးအပ်ခြင်းဖြစ်ပါကြောင်း၊ထို့အပြင် လူမှုရေးအကူအညီလိုအပ်နေသူများအတွက်စေတနာ့ဝန်ထမ်းအဖွဲ့အစည်းများ၏အင်အားကိုရယူပြီးနှစ်စဉ်ဘဏ္ဍာနှစ်အလိုက် လုပ်ငန်းစဉ်များ ချမှတ်ကာ စနစ်တကျဆောင်ရွက်ပေးလျက်ရှိပါကြောင်း၊ ရပ်ရွာအတွင်းလူမှုရေးလိုအပ်ချက်များအပေါ်မူတည်ပြီး စေတနာကိုအရင်းခံ၍ တည်ထောင်ဖွင့်လှစ်ဆောင်ရွက်နေကြသောကိုယ့်အားကိုယ်ကိုးမူလတန်းကြိုကျောင်းများ၊လူငယ်ဖွံ့ဖြိုးရေးပရဟိတဂေဟာများ၊ အမျိုးသမီးဂေဟာများမသန်စွမ်းဂေဟာများနဲ့ ဘိုးဘွားရိပ်သာများအားနိုင်ငံတော်အနေဖြင့်ထောက်ပံ့ခြင်းဖြစ်ပါကြောင်း၊ဂေဟာ/ရိပ်သာများအနေဖြင့် ဘဏ္ဍာရေးစည်းမျဉ်းများ၊ စံလုပ်ငန်းလမ်းညွှန်များနှင့်အညီဆောင်ရွက်စေလိုကြောင်း ပြောကြားပါသည်။
ထို့နောက် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီးက ၂၀၂၅-၂၀၂၆ ဘဏ္ဍာနှစ်၊ ပြည်ထောင်စုနယ်မြေ၊ နေပြည်တော်အတွင်းရှိ စေတနာ့ဝန်ထမ်းအဖွဲ့အစည်းများဖြစ်သော လူငယ်ဖွံ့ဖြိုးရေးပရဟိတဂေဟာ ၁၁ ခု၊ အမျိုးသမီးဂေဟာ ၃ ခုနှင့် ဘိုးဘွားရိပ်သာ ၃ ခု၊ စုစုပေါင်း ဂေဟာ/ရိပ်သာ ၁၇ ခုနှင့် ကိုယ့်အားကိုယ်ကိုးမူလတန်းကြိုကျောင်း ၆၀ ကျောင်းတို့အတွက်ထောက်ပံ့ကြေးကျပ် ၂၉၇.၈၆၇သန်းကိုနေပြည်တော်ကောင်စီဝင် ဗိုလ်မှူးကြီးရဲမိုးထံသို့လည်းကောင်း၊ ယာယီတိုက်ပွဲရှောင်ပြည်သူ ၁၁၀၃၆ ဦးအတွက် နိုင်ငံတော်က ထောက်ပံ့ငွေ ကျပ် ၆၆၂.၁၆၀ သန်းကို နေပြည်တော်ကောင်စီ ဝင် ဦးဇေယျာလင်းထံသို့လည်းကောင်းပေးအပ်ခဲ့ပါသည်။
လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ဒုတိယဝန်ကြီးက အသက် ၈၅ နှစ်နှင့်အထက် လူမှုရေးပင်စင်အကျိုးခံစားခွင့်ရှိသူသက်ကြီးပုဂ္ဂိုလ် ၄၇၅၉ ဦးအတွက် လူမှုရေးပင်စင်ထောက်ပံ့ကြေးကျပ် ၂၈၄.၄၀၀ သန်းအား နေပြည်တော်ကောင်စီဝင် ဦမြင့်စိုးထံသို့ ပေးအပ်ခဲ့ပါသည်။
အစီအစဉ်အရစေတနာ့ဝန်ထမ်းအဖွဲ့အစည်းများမှကိုယ်စားလှယ်တစ်ဦးကကျေးဇူးတင်စကားပြောကြားခဲ့ပါသည်။
ယနေ့ကျင်းပခဲ့သောအခမ်းအနားတွင်ပြည်ထောင်စုနယ်မြေ၊နေပြည်တော်အတွင်းရှိအသက်၈၅နှစ်နှင့်အထက်သက်ကြီးပုဂ္ဂိုလ်များအတွက်လူမှုရေးပင်စင်အကျိုးခံစားခွင့်ရှိသူ၄၇၅၉ဦး၊စေတနာ့ဝန်ထမ်းအဖွဲ့အစည်းများကစောင့်ရှောက်ထားသူ၂၇၀၄ဦးနှင့်တိုက်ပွဲရှောင်ပြည်သူ၁၁၀၃၆ဦး၊စုစုပေါင်း၁၈၄၉၉ဦးအတွက်ထောက်ပံ့ငွေစုစုပေါင်း၁,၂၄၄.၄၂၇ကျပ်သန်းထောက်ပံ့ပေးခဲ့ပါကြောင်းသတင်းရရှိပါသည်။
