လူမှုရေးဆိုင်ရာအသိပညာမြင့်မားရေးသင်တန်းဖွင့်ပွဲအခမ်းအနားကိုယနေ့နံနက်တွင်လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊စုပေါင်းခန်းမ၌ကျင်းပပြုလုပ်ရာလူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ပြည်ထောင်စုဝန်ကြီး၊ဒေါက်တာသက်သက်ခိုင်အမြဲတမ်းအတွင်းဝန်၊ ညွန်ကြားရေးမှူးချုပ်များ၊ ဒုတိယညွန်ကြားရေးမှူးချုပ်များ၊သင်တန်းနည်းပြများနှင့်သင်တန်းသားအရာထမ်း၊အမှုထမ်းများတက်ရောက်ခဲ့ကြပါသည်။
ပြည်ထောင်စုဝန်ကြီးကအဖွင့်အမှာစကားပြောကြားရာတွင်လူမှုရေးဆိုင်ရာ အသိပညာနှင့် စပ်လျဉ်းသည့်အဓိကသဘောတရားနှင့်အယူအဆများကို သိရှိနားလည်ပြီးလက်ရှိကြုံတွေ့နေရသောလူမှုရေး အခက်အခဲ၊ ပြဿနာတို့ကို ဖြေရှင်းဆောင်ရွက်နိုင်ရန်လိုအပ်ကြောင်း၊ဝန်ထမ်းတစ်ဦးချင်း၏ ခံယူချက်ပိုမိုကောင်းမွန်လာပြီး ဝန်ထမ်းများအကြား ထိရောက်မှုရှိရှိ ပူးပေါင်းဆောင်ရွက်ပါကအဖွဲ့လိုက်ပူးပေါင်းဆောင်ရွက်အရည်အသွေးတိုးတက်လာပြီး လုပ်ငန်း ပိုမိုအောင်မြင်နိုင်စေရေးအတွက် အထောက်အကူဖြစ်စေပါကြောင်း၊လူမှုရေးကဏ္ဍသည်အလွန်အရေးကြီးသလိုနက်နဲခက်ခဲသည်ကိုလည်းတွေ့ရှိရမှာဖြစ်ကြောင်း၊လူမှုရေးကိစ္စများကိုဆောင်ရွက်နေသူများသည်လူမှုရေးဆိုင်ရာနည်းပညာရပ်များကိုကျွမ်းကျင်ရမည်ဖြစ်ကြောင်း၊ကောင်းမွန်သောပေါင်းသင်းဆက်ဆံရေးရှိရန်လိုအပ်သည့်အပြင်လုပ်ဖော်ကိုင်ဖက်အချင်းချင်းအပေါ်တွင်လည်းမေတ္တာတရားအရင်းခံပြီးဖေးမကူညီဆောင်ရွက်ကြရန် လိုအပ်ပါကြောင်း၊ပြည်သူလူထုနှင့်တိုက်ရိုက်ထိတွေ့ရသည့်အတွက်လူမှုရေးနယ်ပယ်အတွင်းတစ်ဦးနှင့်တစ်ဦးဆက်သွယ်ပြောဆိုသည့်အခါတွင် လိုက်နာစောင့်ထိန်းရမည့်ကျင့်ဝတ်နှင့်စည်းကမ်းတို့ကိုသိရှိနားလည်ရန်လိုအပ်ကြောင်း၊လူမှုရေးပညာရပ်၏အဓိကအနှစ်သာရဖြစ်သည့်လူမှုဝန်ထမ်းသမားတစ်ဦးအနေဖြင့်မိမိကိုယ်တိုင်ခံယူချက်တို့ကိုပြောင်းလဲနိုင်မှသာမိမိတို့ဝန်ဆောင်မှုပေးရသူ(Client)အတွက်ပြန်လည်ထူထောင်ရေးဆိုင်ရာဝန်ဆောင်မှုကောင်းတို့ကိုပံ့ပိုးပေးနိုင်မည်ဖြစ်ကြောင်း၊သင်တန်းတက်ရောက်မည့်ဝန်ထမ်းများအနေဖြင့်ယခုသင်တန်းမှလေ့လာသိရှိရသည့်အသိပညာ၊အတတ်ပညာများကိုပြည်သူလူထုအတွက်ဝန်ဆောင်မှုပေးနိုင်ရန်အပြင်ဝန်ထမ်းအချင်းချင်းပိုမိုချစ်ခင်ရင်းနှီးစွာလက်တွဲ၍အားလုံးအတွက်သာယာပျော်ရွှင်ဖွယ်ကောင်းသည့်လုပ်ငန်းခွင်ကိုဖန်တီးနိုင်ရေး ကြိုးပမ်းဆောင်ရွက်ကြရန်တိုက်တွန်းပါကြောင်းပြောကြားခဲ့ပါသည်။
လူမှုရေးဆိုင်ရာအသိပညာမြင့်မားရေးသင်တန်းတွင် လူမှုရေးဆိုင်ရာတန်ဖိုးနှင့်စံနှုန်းများ၊လူမှုရေးဆိုင်ရာကျင့်ဝတ်တရား၊ကျား/မတန်းတူညီမျှရေးဆိုင်ရာလူမှုရေးစံနှုန်းများ၊လူ့တန်ဖိုး၊ဝန်ထမ်းကျင့်ဝတ်နှင့်စည်းမျဉ်းများ၊ထိရောက်မှုရှိသောပူးပေါင်းဆောင်ရွက်မှုနှင့်စပ်လျဉ်းသည့်သင်ခန်းစာတို့ကိုဘာသာရပ်ဆိုင်ရာပုဂ္ဂိုလ်များမှ၅.၇.၂၀၂၂၃ရက်မှ၆.၇.၂၀၂၃ရက်အထိ (၂) ရက်တာပို့ချသွားမည်ဖြစ်ကြောင်းသတင်းရရှိသည်။
