လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ပြည်ထောင်စုဝန်ကြီးဒေါက်တာစိုးဝင်းသည်မြန်မာနိုင်ငံခရီးသွားလုပ်ငန်းအဖွဲ့ချုပ်(MTF) ၏ဥက္ကဋ္ဌဖြစ်သူဦးရန်ဝင်းဦးဆောင်သောအဖွဲ့အားယနေ့မွန်းလွဲပိုင်း (၁၃:၀၀) နာရီတွင်အဆိုပါဝန်ကြီးဌာန၊အစည်းအဝေးခန်းမ၌လက်ခံတွေ့ဆုံခဲ့ပါသည်။
တွေ့ဆုံရာတွင် မြန်မာနိုင်ငံခရီးသွားလုပ်ငန်းအဖွဲ့ချုပ်ဥက္ကဋ္ဌမှ အဖွဲ့ချုပ်ဖွဲ့စည်းမှု၊ အသင်းအဖွဲ့မှတ်ပုံတင်ရရှိမှု၊အဖွဲ့ချုပ်အနေဖြင့် ၂၀၂၄ ခုနှစ်၊စက်တင်ဘာလ ၁၃ ရက်နေ့တွင် ဘေးအန္တရာယ်တုံ့ပြန်ရေးလုပ်ငန်းအဖွဲ့ ဖွဲ့စည်း၍ ရေဘေးအကူအညီပေးရေးလုပ်ငန်းများကိုနေပြည်တော်၊ တောင်ငူ၊ ရှမ်းပြည်နယ်တောင်ပိုင်းတို့တွင် ဆောင်ရွက်ခဲ့မှုများနှင့်စပ်လျဉ်း၍တင်ပြခဲ့ပြီးနေပြည်တော်ရှိရေဘေးသင့်ကျေးရွာများပြန်လည်ထူထောင်ရေးတွင် ဆက်လက်ပူးပေါင်းဆောင်ရွက်လိုသည့်ကိစ္စရပ်များကိုတင်ပြဆွေးနွေးခဲ့ပါသည်။
ပြည်ထောင်စုဝန်ကြီးကဘေးအန္တရာယ်ဆိုင်ရာစီမံခန့်ခွဲမှုနှင့်စပ်လျဉ်း၍ အမျိုးသားသဘာဝဘေးအန္တရာယ်ဆိုင်ရာစီမံခန့်ခွဲမှုကော်မတီကိုဖွဲ့စည်း၍ ညှိနှိုင်းဆောင်ရွက်ပေးနေမှု၊ရေဘေးကြောင့် ထိခိုက်ပျက်စီးမှုအခြေအနေများ၊ ရေဘေးပြန်လည်ထူထောင်ရေးဆိုင်ရာနိုင်ငံတော်၏အစီအမံများ၊ သဘာဝပတ်ဝန်းကျင်ထိမ်းသိမ်းရေး(Environmental Conservation) နှင့် ဘေးအန္တရာယ်ကြောင့် ထိခိုက်ဆုံးရှုံးနိုင်ခြေလျှော့ချရေး (Disaster Risk Reduction)ဆိုင်ရာအသိအမြင်များကိုမျိုးဆက်သစ်များအနေဖြင့်ငယ်ရွယ်စဉ်ကပင်သိနားလည်ရန်လိုအပ်နေမှုနှင့် ခရီးသွားလုပ်ငန်းအစီအစဉ်များဆောင်ရွက်ရာတွင်လည်းယင်းအသိအမြင်များတစ်ပါတည်းပေါင်းစပ်ဆောင်ရွက်ပေးရန် တိုက်တွန်းပြောကြားခဲ့ပါသည်။
တွေ့ဆုံပွဲသို့ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနမှညွှန်ကြားရေးမှူးချုပ်၊ ဒုတိယ ညွှန်ကြားရေးမှူးချုပ်နှင့်တာဝန်ရှိသူများပါဝင်တက်ရောက်ခဲ့ကြကြောင်းသတင်းရရှိပါသည်။
