မိုခါဆိုင်ကလုန်းမုန်တိုင်းဘေးသင့်ဒေသများအတွက် မြန်မာသံရုံး၊ တိုကျိုမြို့မှတစ်ဆင့် တိုကျိုမြို့အခြေစိုက် Asia-Pacific Ladies Friendship Society (ALFS)အသင်းကြီးကလှူဒါန်းသည့်ဂျပန်ယန်း၊ နိုင်ငံခြားရေးဝန်ကြီးဌာနမှ ဝန်ထမ်းများ၊ ပြည်ပရောက်မြန်မာနိုင်ငံသားများ၊ မြန်မာသံရုံးများ၊ မိတ်ဖက်နိုင်ငံခြားကုမ္ပဏီများမှလှူဒါန်းသည့်အလှူငွေ (နိုင်ငံခြားသုံးငွေ-၅မျိုး)နှင့် မြန်မာကျပ်ငွေလှူဒါန်းခြင်းအခမ်းအနားကိုသဘာဝဘေးအန္တရာယ်ဆိုင်ရာစီမံခန့်ခွဲမှုဗဟိုဌာန(DMC)တွင်ယနေ့မွန်းလွဲပိုင်းကကျင်းပရာအခမ်းအနားသို့လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာနပြည်ထောင်စုဝန်ကြီးဒေါက်တာစိုးဝင်း၊ နိုင်ငံခြားရေးဝန်ကြီးဌာန၊ဒုတိယဝန်ကြီးဦးကျော်မျိုးထွဋ်နှင့် တာဝန်ရှိသူများတက်ရောက်ခဲ့ကြပါသည်။
အခမ်းအနားတွင် နိုင်ငံခြားရေးဝန်ကြီးဌာနဒုတိယဝန်ကြီးကလှူဒါန်းရခြင်းနှင့်စပ်လျဉ်း၍ ပြောကြားရာယနေ့လှူဒါန်းမှုမှာမြန်မာသံရုံး၊တိုကျိုမြို့မှတစ်ဆင့် တိုကျိုမြို့အခြေစိုက်Asia-Pacific Ladies Friendship Society (ALFS)အသင်းကြီးကလှူဒါန်းသည့် ဂျပန်ယန်း ၆၂၁,၀၀၀နှင့်ညီမျှသည့် မြန်မာငွေကျပ် ၉,၃၁၅,၀၀၀/-၊ နိုင်ငံခြားရေးဝန်ကြီးဌာနမှ ဝန်ထမ်းများ၊ ပြည်ပရှိမြန်မာသံရုံး၊ မြန်မာအမြဲတမ်းကိုယ်စားလှယ်အဖွဲ့ရုံး၊ မြန်မာကောင်စစ်ဝန်ချုပ်ရုံးတို့မှ ဝန်ထမ်းများ၊ ပြည်ပနိုင်ငံများရှိမြန်မာနိုင်ငံသားများ၊ကုမ္ပဏီများ၊အဖွဲ့အစည်းများမှလှူဒါန်းသည့်မြန်မာငွေကျပ်(၆)သိန်းနှင့် နိုင်ငံခြားငွေ(၅)မျိုးနှင့်ညီမျှသည့် မြန်မာငွေကျပ်(၈၃,၅၁၄,၀၀၀)ဖြစ်ပါကြောင်းပြောကြားခဲ့ပါသည်။
ထို့နောက်ပြည်ထောင်စုဝန်ကြီး၊ ဒေါက်တာစိုးဝင်းကကျေးဇူးတင်စကားပြန်လည်ပြောကြားရာ၌ မိုခါဆိုင်ကလုန်းမုန်တိုင်းဘေးကြိုတင်ပြင်ဆင်ရေး၊ တုံ့ပြန်ဆောင်ရွက်ရေးနှင့် ပြန်လည်ထူထောင်ရေးလုပ်ငန်းများတွင် နိုင်ငံတော်အစိုးရ၏ဦးဆောင်မှု၊ အမျိုးသားသဘာဝဘေးအန္တရာယ်ဆိုင်ရာစီမံခန့်ခွဲမှုကော်မတီ၏လမ်းညွှန်မှုနှင့်အတူအားလုံးပူးပေါင်းပါဝင်ဆောင်ရွက်မှုများကြောင့် ကြိုတင်ပြင်ဆင်ခြင်း၊ အရေးပေါ်တုံ့ပြန်ခြင်းအပိုင်းများတွင် အကောင်းဆုံးဆောင်ရွက်နိုင်ခဲ့ပြီးယခုပြန်လည်ထူထောင်ရေးလုပ်ငန်းများကိုကဏ္ဍအလိုက်၊ ဦးစားပေးအဆင့်အလိုက် ဆောင်ရွက်လျက်ရှိပါကြောင်း၊ မိုခါဆိုင်ကလုန်းမုန်တိုင်းဘေးအတွက် နိုင်ငံတကာအသိုင်းအဝိုင်းများမှ လှူဒါန်းထောက်ပံ့မှုများကိုတပ်မတော်နှင့် ပို့ဆောင်ရေးနှင့်ဆက်သွယ်ရေးဝန်ကြီးဌာနမှ ရေယာဉ်၊ လေယာဉ်များဖြင့်စစ်တွေမြို့သို့အမြန်ဆုံးပို့ဆောင်ပေးခဲ့ပြီး စစ်တွေမြို့မှတစ်ဆင့် ဘေးသင့်ဒေသမြို့နယ်များအထိ ဆက်လက်ဖြန့်ဝေပေးလျက်ရှိပါကြောင်း၊ ယခုကဲ့သို့ အလှူငွေများလာရောက်လှူဒါန်းပေးခြင်းအတွက်ကျေးဇူးတင်ရှိပါကြောင်း၊အဆိုပါငွေများကိုဘေးသင့်ဒေသများအတွက် အကျိုးရှိစွာအသုံးပြုဆောင်ရွက်သွားမည်ဖြစ်ကြောင်း၊ အလှူရှင်များအားလုံးကိုနိုင်ငံတော်နှင့် ဘေးသင့်သူများကိုယ်စားကျေးဇူးတင်ပါကြောင်းနှင့် လေးစားစွာမှတ်တမ်းတင်အပ်ပါကြောင်းပြောကြားခဲ့ပါသည်။
ထို့နောက် နိုင်ငံခြားရေးဝန်ကြီးဌာန၊ ဒုတိယဝန်ကြီးကအလှူငွေများကိုပေးအပ်ခဲ့ရာ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီးကလက်ခံရယူပြီးဂုဏ်ပြုမှတ်တမ်းလွှာ ပြန်လည်ပေးအပ်ခဲ့ကြောင်းသတင်းရရှိပါသည်။
