မလေးရှားနိုင်ငံမှ ပြန်လည်ရောက်ရှိလာသည့် မြန်မာအလုပ်သမား (၁၀၈၆)ဦးအား ကြိုဆို ထောက်ပံ့ခြင်းလုပ်ငန်းများဆောင်ရွက်
မတ်လ ၁၇၊ နေပြည်တော်
မလေးရှားနိုင်ငံသို့ ရောက်ရှိနေပြီး မြန်မာနိုင်ငံသို့ ပြန်လာရန် အခက်အခဲရှိနေသည့် မြန်မာ အလုပ်သမား(၁၀၈၆)ဦးသည် (၂၇.၂.၂၀၂၁)ရက်နေ့တွင် ရန်ကုန်မြို့၊ သီလဝါဆိပ်ကမ်းသို့ ပြန်လည် ရောက်ရှိလာရာ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၊ ဘေးအန္တရာယ် ဆိုင်ရာစီမံခန့်ခွဲမှုဦးစီးဌာနအနေဖြင့် ကျားလုံချည်(၉၉၁)ထည်၊ မလုံချည် (၉၂) ထည်၊ တီရှပ်(၁၀၈၆) ထည်၊ တဘက် (၁၀၁၆)ထည်နှင့် ဆပ်ပြာ(၁၀၈၆)တောင့်တို့ကို ထောက်ပံ့ပေးခြင်း၊ စစ်ရေယာဉ်ပေါ် ၌ ကျွေးမွေးခဲ့သည့် ( ခေါက်ဆွဲခြောက်၊ ပုန်းရည်ကြီး၊ ဘီစကွတ် ) စသည့် ရိက္ခာခြောက်ဖိုးငွေကျပ် (၃,၈၀၁,၅၀၀)ကို ကျခံဆောင်ရွက်ပေးခြင်း၊ နေရပ်ဒေသအသီးသီးသို့ ပြန်လည်ထွက်ခွာမည့် မြန်မာ အလုပ်သမား(၁၀၈၆)ဦးအတွက် တီရှပ်( ၁ )ထည်စီနှင့် လမ်းခရီးစားစရိတ်ငွေ တစ်ဦးလျှင် ( ၁ )ရက် (၃၀၀၀)ကျပ်နှုန်းဖြင့် (၇)ရက်စာ စုစုပေါင်းငွေကျပ် (၂၂,၈၀၆,၀၀၀)ကိုလည်းကောင်း၊ နေရပ်ပြန်သည့် ခရီးစရိတ်ကျသင့်ငွေကိုလည်းကောင်း အမှတ်(၁)စစ်ကြောရေးနှင့် တည်းခိုရေးစခန်း(ဘုရင့်နောင်)ရှိ Quarantine Center တွင် ဒုတိယညွှန်ကြားရေးမှူးချုပ်(လုပ်ငန်း)နှင့် ရန်ကုန်တိုင်းဒေသကြီးဦးစီးမှူး တို့မှ သွားရောက်ထောက်ပံ့ပေးခဲ့ပါသည်။
ထို့အပြင် လူမှုဝန်ထမ်းဦးစီးဌာနအနေဖြင့် မြန်မာအလုပ်သမား (၁၀၈၆)ဦးအနက် ကိုယ်ဝန်ဆောင် မိခင်(၁)ဦး၊ မသန်စွမ်းသူ(၄)ဦး၊ အသက်(၅)နှစ်အောက် ကလေး(၂၀)ဦး၊ စုစုပေါင်း(၂၅)ဦးအား တစ်ဦးလျှင်ငွေ ကျပ်(၃၀,၀၀၀)နှုန်းဖြင့် စုစုပေါင်းငွေကျပ် (၇၅၀,၀၀၀)ကို အမှတ်(၁)စစ်ကြောရေးနှင့် တည်းခိုရေးစခန်း (ဘုရင့်နောင်)ရှိ Quarantine Center တွင် သွားရောက်ထောက်ပံ့ပေးခဲ့ပါသည်။
အဆိုပါ မြန်မာအလုပ်သမား (၁၀၈၆)ဦးအား အမှတ်(၁)စစ်ကြောရေးနှင့် တည်းခိုရေးစခန်း (ဘုရင့်နောင်)တွင် Coronavirus Disease 2019 (COVID-19) ကာကွယ်၊ ထိန်းချုပ်၊ ကုသရေး ဗဟိုကော်မတီ၏ ညွှန်ကြားချက်နှင့်အညီ Quarantine (၁၄)ရက် ထားရှိခဲ့ပြီးနောက် (၁၃.၃.၂၀၂၁) ရက်နေ့က သက်ဆိုင်ရာ တိုင်းဒေသကြီး/ပြည်နယ် အသီးသီးသို့ ပြန်လည်ထွက်ခွာပြီဖြစ်ကြောင်း သတင်းရရှိပါသည်။
