လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ပြည်ထောင်စုဝန်ကြီးဒေါက်တာစိုးဝင်းအားကုလသမဂ္ဂကလေးများရန်ပုံငွေအဖွဲ့ (UNICEF) ၏မြန်မာနိုင်ငံဆိုင်ရာဌာနေကိုယ်စားလှယ် Mr. MarcoluigiCorsiဦးဆောင်သောအဖွဲ့ကယနေ့နံနက်ပိုင်း (၁၁:၀၀) နာရီတွင်အဆိုပါဝန်ကြီးဌာန၊အစည်းအဝေးခန်းမ၌လာရောက်တွေ့ဆုံခဲ့ပါသည်။
တွေ့ဆုံစဉ်UNICEF နှင့် ဝန်ကြီးဌာနတို့အကြားကလေးသူငယ် ကာကွယ် စောင့်ရှောက်ရေး၊ လူမှုကာကွယ်စောင့်ရှောက်ရေး၊ မိုင်းအန္တရာယ်အသိပညာပေးရေးစသည့်နယ်ပယ်များတွင် ကာလရှည်ကြာစွာပူးပေါင်းဆောင်ရွက်ခဲ့မှု၊လူမှုဝန်ထမ်းဦးစီးဌာနမှ Nation Wide Case Management Supervision Unit (NCMSU) အားဖွဲ့စည်းပြီးကလေးသူငယ်ကာကွယ်စောင့်ရှောက်ရေးလုပ်ငန်းများဆောင်ရွက်လျက်ရှိမှု၊ UNICEF နှင့် လူမှုဝန်ထမ်းဦးစီးဌာနတို့အကြားလက်မှတ်ရေးထိုးခဲ့သောလူမှုရေးဆိုင်ရာမူဝါဒလုပ်ငန်းအစီအစဉ်၊ ကလေးသူငယ် ကာကွယ်ရေးလုပ်ငန်းအစီအစဉ်နှင့်ရှေးဦးအရွယ် ကလေးသူငယ်လေ့လာသင်ယူမှုဆိုင်ရာလုပ်ငန်းအစီအစဉ်များအားအချိန်နှင့်တစ်ပြေးညီဝန်ကြီးဌာနနှင့်ပူးပေါင်းအကောင်အထည်ဖော်ဆောင်ရွက်ရန်ကိစ္စ၊ UNICEF မှ ဆောင်ရွက်လျက်ရှိသောလုပ်ငန်းအချက်အလက်များအားဝန်ကြီးဌာနသို့ မျှဝေရန်ကိစ္စ၊ မိုင်းအန္တရာယ်အသိပညာပေးရေးလုပ်ငန်းများကိစ္စ၊ စိတ်လူမှုရေးပိုင်းဆိုင်ရာအထောက်အပံ့ပေးရေး (Psycho-Social Support) ကိစ္စရပ်များ၊ UNICEF အဖွဲ့မှ နိုင်ငံခြားသားဝန်ထမ်းများ၏ ပြည်ဝင်ဗီဇာ၊ပြည်တွင်းခရီးသွားလာခွင့်နှင့် အခြားလိုအပ်သောထောက်ပံ့ပေးမှုများအတွက် ဝန်ကြီးဌာနကထောက်ခံပေးနိုင်ရေးကိစ္စ၊ ဝန်ကြီးဌာနနှင့် UNICEF တို့အကြားဆက်လက်ပူးပေါင်းဆောင်ရွက်သွားမည့်ကိစ္စရပ်များအားရင်းနှီးပွင့်လင်းစွာအမြင်ချင်းဖလှယ်ဆွေးနွေးခဲ့ကြပါသည်။
တွေ့ဆုံပွဲသို့ဒုတိယဝန်ကြီးဦးစိုးကြည်၊ဦးစီးဌာနများမှညွှန်ကြားရေးမှူးချုပ်များနှင့်တာဝန်ရှိသူများပါဝင်တက်ရောက်ခဲ့ကြကြောင်းသတင်းရရှိပါသည်။
