လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီးဒေါက်တာစိုးဝင်းသည်တာဝန်ရှိသူများလိုက်ပါ၍(၉.၁.၂၀၂၄)ရက်နေ့၊  မွန်းလွဲပိုင်းတွင်ရှမ်းပြည်နယ်(အရှေ့)၊ ကျိုင်းတုံမြို့နယ်အတွင်းရှိ လူမှုဝန်ထမ်းဦးစီးဌာန၊ ကျိုင်းတုံမူလတန်းကြိုကျောင်း၊ ကလေးပြုစုရေးဌာန၊ အမျိုးသမီးသက်မွေးပညာသင်ကျောင်းနှင့် ဘေးအန္တရာယ်စီမံ ခန့်ခွဲမှုဦးစီးဌာန သိုလှောင်ရုံတို့သို့ သွားရောက်ကြည့်ရှုစစ်ဆေးခဲ့ပါသည်။

ပြည်ထောင်စုဝန်ကြီးက မူလတန်းကြိုကျောင်းတွင် ကလေးငယ်များ၏ကျန်းမာရေး စောင့်ရှောက်မှုအခြေအနေ၊ သန့်ရှင်းသပ်ရပ်စွာဖြင့် အာဟာရပြည့်ဝစွာကျွေးမွေးနိုင်မည့်အခြေအနေ၊သင်ရိုးညွှန်းတမ်းနှင့်အညီကလေးများအားစနစ်တကျလေ့ကျင့် သင်ကြားပေးနိုင်မှုအခြေအနေ၊ ဆရာမများအနေဖြင့် စိတ်ကောင်းစေတနာကောင်းများဖြင့် ပြုစုပျိုးထောင်သင်ကြားပေးရေးတို့ကို မှာကြားခဲ့ပါသည်။

ဆက်လက်၍ ကျိုင်းတုံကလေးပြုစုရေးဌာနတွင်လက်ခံစောင့်ရှောက်ထားသည့် ကလေးငယ်(၅၀)ဦး၏ပညာသင်ကြားလေ့ကျင့်နေမှု၊ သင်ယူရာနေရာများနှင့် ကျွေးမွေးစောင့်ရှောက်မှုအခြေအနေ၊ ကျောင်းနှင့်ကျောင်းပတ်ဝန်းကျင်အခြေအနေတို့ကိုကြည့်ရှုစစ်ဆေးခဲ့ပါသည်။ထို့နောက် ကလေးများနှင့် ရင်းရင်းနှီးနှီးတွေ့ဆုံ၍ အရုပ်များနှင့် စားသောက်ဖွယ်ရာများကိုတစ်ဦးချင်းပေးအပ်ခဲ့ပါသည်။

ထို့နောက်ပြည်ထောင်စုဝန်ကြီးနှင့်အဖွဲ့သည်အမျိုးသမီးသက်မွေးအတတ်ပညာသင်ကျောင်းသို့ ရောက်ရှိခဲ့ရာကျောင်းအုပ်ကတောင်ပေါ်ဒေသတွင်နေထိုင်ပြီးဆင်းရဲနွမ်းပါး၍မိသားစုများကပညာဆက်လက်သင်ကြားပေးရန် ခက်ခဲသည့်ကလေးငယ်(၅၆)ဦးအားပညာဆက်လက်သင်ကြားနိုင်ရန် လူမှုဝန်ထမ်းဦးစီးဌာနက ၂၀၂၃-၂၀၂၄ ပညာသင်နှစ်အတွင်းအမျိုးသမီးသက်မွေးအတတ်ပညာသင်ကျောင်းတွင် လက်ခံစောင့်ရှောက်ပေးနေမူအခြေအနေများကိုရှင်းလင်းတင်ပြခဲ့ပါသည်။

ပြည်ထောင်စုဝန်ကြီးကကလေးငယ်များကိုအတန်းပညာသာမက ၎င်းတို့၏ဘဝဖွံ့ဖြိုးတိုးတက်ရေးဆိုင်ရာအသိပညာများ၊ ကျန်းမာရေးဆိုင်ရာအသိပညာဗဟုသုတများကိုလည်းသက်ဆိုင်ရာကဏ္ဍအလိုက်ပညာရှင်များဖိတ်ခေါ်၍ အသိပညာပေးခြင်းများဆောင်ရွက်ပေးရန်နှင့် နွေရာသီကျောင်းပိတ်ရက်တွင် အသက်မွေးဝမ်းကျောင်းပညာရပ်များသင်ကြားပေးရန်လမ်းညွှန်မှာကြားခဲပြီးကလေးငယ်များနှင့် ရင်းရင်းနှီးနှီးနှုတ်ဆက်ပြီးစားသောက်ဖွယ်ရာနှင့် လက်ဆောင်ပစ္စည်းများပေးအပ်ခဲ့ပါသည်။

ဆက်လက်၍ ပြည်ထောင်စုဝန်ကြီးသည် ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန ကျိုင်းတုံခရိုင်ဦးစီးမှုးရုံးနှင့် ကယ်ဆယ်ရေးပစ္စည်းသိုလှောင်ရုံသို့ သွားရောက်၍ ကယ်ဆယ်ရေးပစ္စည်းများသိုလှောင်ထားရှိမှုကို  ကြည့်ရှုစစ်ဆေးပါသည်။ ပြည်ထောင်စုဝန်ကြီးက ကယ်ဆယ်ထောက်ပံ့ပစ္စည်းများကို လေလွင့်ပျက်စီးမှု များမဖြစ်ပေါ်စေရေး၊ သက်တမ်းပြည့်ကောင်းမွန်စွာဖြင့် ဘေးသင့်သူများလက်သို့ ထောက်ပံ့နိုင်ရေးတို့အတွက် ထုတ်ပြန်ထားသော သိုလှောင်ရုံထိန်းသိမ်းရေးလက်စွဲနှင့်အညီ စနစ်တကျထားသို ထိန်းသိမ်းရန်နှင့်မီးဘေးအပါအဝင် သိုလှောင်ရုံလုံခြုံရေးကို ဝန်ထမ်းများ အထူးသတိပြုဆောင်ရွက်ကြရန်တို့ကို မှာကြားခဲ့ကြောင်း သတင်းရရှိပါသည်။