လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ပြည်ထောင်စုဝန်ကြီးဒေါက်တာစိုးဝင်းအားကုလသမဂ္ဂဒုက္ခသည်များဆိုင်ရာမဟာမင်းကြီးရုံး(UNHCR) ၏တတိယရာထူးအကြီးဆုံးနှင့် ကုလသမဂ္ဂလက်ထောက်အတွင်းရေးမှူးချုပ်ဖြစ်သူ လုပ်ငန်းလည်ပတ်မှုဆိုင်ရာ လက်ထောက်မဟာမင်းကြီး Mr. RaoufMazouဦးဆောင်သောအဖွဲ့သည်ယနေ့နံနက်ပိုင်း (၀၉:၀၀) နာရီတွင်အဆိုပါဝန်ကြီးဌာန၊အစည်းအဝေးခန်းမ၌လာရောက်တွေ့ဆုံခဲ့ပါသည်။

တွေ့ဆုံစဉ်Mr. RaoufMazou၏မြန်မာနိုင်ငံခရီးစဉ်အတွင်းရခိုင်ပြည်နယ်မောင်တောမြို့၊စစ်တွေမြို့နှင့်ရှမ်းပြည်နယ်၊တောင်ကြီးမြို့များသို့သွားရောက်လေ့လာခဲ့မှုအခြေအနေ၊ဝန်ကြီးဌာနနှင့် UNHCR တို့အကြားနားလည်မှုစာချွန်လွှာ (MoU) လက်မှတ်ရေးထိုးနိုင်ရေးဆောင်ရွက်နေမှုအခြေအနေ၊ UNHCR ၏နိုင်ငံခြားသားဝန်ထမ်းများအတွက်ပြည်ဝင်ခွင့်ဗီဇာနှင့်ပြည်တွင်းခရီးသွားလာခွင့်ကိစ္စများ၊လူသားချင်းစာနာမှုအကူအညီပေးရေးဆိုင်ရာကိစ္စရပ်များနှင့် ဆက်လက်ပူးပေါင်းဆောင်ရွက်မည့်ကိစ္စများအားရင်းနှီးပွင့်လင်းစွာအမြင်ချင်းဖလှယ်ဆွေးနွေးခဲ့ကြပါသည်။

တွေ့ဆုံပွဲသို့ဝန်ကြီးဌာနဘက်မှဒုတိယဝန်ကြီးဦးစိုးကြည်၊အမြဲတမ်းအတွင်းဝန်၊ဦးစီးဌာနများမှညွှန်ကြားရေးမှူးချုပ်များ၊ UNHCR ဘက်မှအာရှ-ပစိဖိတ်ဒေသဆိုင်ရာဗျူရိုညွှန်ကြားရေးမှူး Mr. IndrikaRatwattee၊ UNHCR ၏မြန်မာနိုင်ငံဆိုင်ရာဌာနေကိုယ်စားလှယ် Ms. Noriko Takagi နှင့်တာဝန်ရှိသူများပါဝင်တက်ရောက်ခဲ့ကြကြောင်းသတင်းရရှိပါသည်။