ကလေးသူငယ်အခွင့်အရေးများဆိုင်ရာအမျိုးသားကော်မတီအစည်းအဝေး(၁/၂၀၂၄)ကို ယနေ့ နံနက် (၉:၃၀) နာရီအချိန်တွင် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ဝန်ကြီးရုံး၊ စုပေါင်းအစည်းအဝေးခန်းမ၌ကျင်းပခဲ့ပါသည်။

အစည်းအဝေးသို့ ကလေးသူငယ်အခွင့်အရေးများဆိုင်ရာအမျိုးသားကော်မတီဥက္ကဋ္ဌပြည်ထောင်စုဝန်ကြီးဒေါက်တာစိုးဝင်းနှင့်အဖွဲ့ဝင်ဒုတိယဝန်ကြီးများ၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်များ၊အစိုးရမဟုတ်သောအဖွဲ့အစည်းများကဥက္ကဋ္ဌများ၊အရပ်ဖက်ကလေးသူငယ်အခွင့်အရေးများဆိုင်ရာအဖွဲ့အစည်းများမှတာဝန်ရှိသူများနှင့်တိုင်းဒေသကြီး/ ပြည်နယ်ကလေးသူငယ်ကော်မတီအတွင်းရေးမှူးများ တက်ရောက်ခဲ့ကြပါသည်။

ပြည်ထောင်စုဝန်ကြီးကအဖွင့်အမှာစကားပြောကြားရာတွင် ကလေးသူငယ်အခွင့်အရေးများဆိုင်ရာဥပဒေနှင့်အညီဖွဲ့စည်းခဲ့သည့် အမျိုးသားကော်မတီကို၂၀၂၃ ခုနှစ်၊ ဩဂုတ်လ ၂၄ ရက်နေ့တွင် အဖွဲ့ဝင် ၃၉ ဦးဖြင့်ပြင်ဆင်ဖွဲ့စည်းခဲ့ပြီး လုပ်ငန်းကော်မတီကိုလည်း၂၃.၉.၂၀၂၃ ရက်နေ့တွင် အဖွဲ့ဝင်၄၂ ဦးဖြင့် ဖွဲ့စည်းခဲ့ပါကြောင်း၊ပြည်ထောင်စုနယ်မြေ၊ တိုင်းဒေသကြီး/ ပြည်နယ်၊ ခရိုင်၊ မြို့နယ်တို့တွင်လည်းကလေးသူငယ်အခွင့်အရေးများဆိုင်ရာကော်မတီအဆင့်ဆင့်ဖွဲ့စည်းဆောင်ရွက်ပေးလျက်ရှိပါကြောင်း၊ လူမှုဝန်ထမ်းဦးစီးဌာနအနေဖြင့်တိုင်းဒေသကြီး/ပြည်နယ်များတွင် ကာကွယ်စောင့်ရှောက်ရန်လိုအပ်သော ကလေးသူငယ်များ၊ မသန်စွမ်းကလေးသူငယ်များ၊ အမှုရင်ဆိုင်ဆဲရီမန်ကလေးသူငယ်များနှင့် တရားရုံးအသီးသီးတွင် ပြစ်ဒဏ်ချမှတ်ခြင်းခံရသော ကလေးသူငယ်များအတွက် လူငယ်သင်တန်းကျောင်းစုစုပေါင်း(၁၄)ကျောင်းကို ဖွင့်လှစ်ထားရှိပြီး ကလေးသူငယ် ၂၆၅၀ ဦးအား အတန်းပညာ၊ ကျောင်းပြင်ပပညာရေး၊ အသက်မွေးဝမ်းကျောင်းပညာရပ်များ၊ ကောင်းမွန်သောအလေ့အကျင့်ကောင်းများနှင့် Life Skill တို့ကို သင်ကြားပေးပြီး ရပ်ရွာအတွင်းပြန်လည်ဝင်ဆံ့နိုင်ရေးများဆောင်ရွက်လျက်ရှိပါကြောင်း၊ကလေးသူငယ်များ၏ ပြဿနာများကိုထိထိရောက်ရောက်ဖြေရှင်းပေးနိုင်ရန်အတွက်လည်း လူမှုရေးရာဖြစ်ရပ်စီမံခန့်ခွဲမှု သတင်းအချက်အလက်စနစ် (Case Management Information System- CMIS)အား အကောင်အထည်ဖော်ခဲ့ပြီး ၂၀၁၈ ခုနှစ်မှ ၂၀၂၄ ခုနှစ်၊ အောက်တိုဘာလအတွင်းကာကွယ်စောင့်ရှောက်ရန်လိုအပ်သည့် ကလေးသူငယ်များ၊ဥပဒေနှင့်ငြိစွန်းသည့်ကလေးသူငယ်များ၊ ရုပ်ပိုင်းဆိုင်ရာနှင့် လိင်ပိုင်းဆိုင်ရာအလွဲသုံးစားပြုခြင်းခံရသူ ကလေးသူငယ်များ၊ ကျား/မအခြေပြုအကြမ်းဖက်မှုဆိုင်ရာကိစ္စရပ်များ၊ ဥပဒေနှင့် ငြိစွန်းသည့် ဖြစ်ရပ် (၆၉၉၀)ခု၊ ဥပဒေနှင့် မငြိစွန်းသည့်ဖြစ်ရပ်(၉၇၄)ခု စုစုပေါင်း (၇၉၆၄) ကို စနစ်တကျမှတ်တမ်းတင်ဆောင်ရွက်ပေးနိုင်ခဲ့ပါကြောင်း၊ ရပ်ရွာအတွင်းရှိ ကလေးသူငယ်များကို စောင့်ရှောက်ထားသည့်ပရဟိတဂေဟာများတွင်အနိမ့်ဆုံးရှိရမည့်ပြုစုစောင့်ရှောက်ခြင်းနှင့်အကာအကွယ်ပေးခြင်းဆိုင်ရာ စံချိန်စံညွှန်းများနှင့်အညီလက်ခံစောင့်ရှောက်ထားမှုအခြေအနေလေ့လာမှုသုတေသနကို ဆောင်ရွက်နိုင်ခဲ့ပြီး စာတမ်းမှရရှိလာသည့်ရလဒ်များဖြင့်ကလေးသူငယ်များ၏အကောင်းဆုံးအကျိုးစီးပွားအားဆောင်ရွက်ပေးနိုင်သည့်အပြင်ဂေဟာ/သင်တန်းကျောင်းများမှတာဝန်ရှိသူများ၊ ပြုစုစောင့်ရှောက်သူများအတွက် အထောက်အကူဖြစ်စေနိုင်မည်သာမကလူမှုဝန်ထမ်းဦးစီးဌာနမှ ပရဟိတဂေဟာများအပေါ်ကြီးကြပ်ရေးလုပ်ငန်းစဉ်များတွင်လည်း ကောင်းစွာအထောက်အကူပြုနိုင်မည်ဖြစ်ပါကြောင်းပြောကြားခဲ့ပါသည်။

ဆက်လက်၍ ကလေးသူငယ်အခွင့်အရေးများကလေးသူငယ်အခွင့်အရေးများဆိုင်ရာ အမျိုးသားကော်မတီအတွင်းရေးမှူး၊ လူမှုဝန်ထမ်းဦးစီးဌာန၊ ညွှန်ကြားရေးမှူးချုပ်က ကလေးသူငယ်အခွင့်အရေးများဆိုင်ရာအမျိုးသားကော်မတီအစည်းအဝေး (၁/၂၀၂၃)၏အစည်းအဝေးဆုံးဖြတ်ချက်များအပေါ် ဆောင်ရွက်ပြီးစီးမှုအခြေအနေအားရှင်းလင်းတင်ပြခြင်း၊လူမှုရေးရာဖြစ်ရပ်စီမံခန့်ခွဲမှုစနစ်ဖြင့်ကလေးသူငယ်အခွင့်အရေးများဆိုင်ရာအကောင်အထည်ဖော်ဆောင်ရွက်ထားရှိမှုများ၊ ကလေးသူငယ်ကာကွယ်စောင့်ရှောက်ရေးမူဝါဒ(မူကြမ်း)များနှင့်ပတ်သက်၍ တာဝန်ရှိသူများက ရှင်းလင်းတင်ပြခြင်းဖြစ်ပါသည်။ ထို့နောက်တက်ရောက်လာကြသောအမျိုးသားကော်မတီဝင်များမှ  အထွေထွေဆွေးနွေးခဲ့ကြပြီးအစည်းအဝေးကို ရုပ်သိမ်းခဲ့ပါကြောင်း သတင်းရရှိပါသည်။